काठमाडौं । माधवकुमार नेपाल नेतृत्वको एकीकृत समाजवादीले घनश्याम भुसाललाई सचिवालय सदस्यमा मनोनीत गरेको छ ।

शनिबार बसेको सो पार्टीको बैठकले भुसाललाई सचिवालय सदस्यमा मनोनीत गरेको हो ।

एकीकृत समाजवादीका प्रवक्ता जगन्नाथ खतिवडाले भुसाललाई सचिवालय सदस्यमा मनोनीत गर्ने निर्णय गरिएको जानकारी दिए ।

भुसाल शुक्रबार मात्रै एकीकृत समाजवादी प्रवेश गरेका थिए । एमालेमा छँदा लामो समय माधवकुमार नेपाललाई साथ दिएका उनी पार्टी विभाजनमा एमालेमै बसेका थिए । तर प्रतिनिधिसभा निर्वाचनको पूर्वसन्ध्यामा टिकट वितरणमा एमाले अध्यक्ष ओलीले अपनाएको कार्यशैलीप्रति रुष्ट बन्दै रुपन्देही १ बाट स्वतन्त्र उम्मेदवारी दिएका थिए । गठबन्धन दलले समर्थन गरे पनि उनी एमालेका छविलाल विश्वकर्मासँग परास्त भएका थिए ।