काठमाडौं । चीनले आफ्नो मानवरहित बेलुनबारे अमेरिकासँग बारम्बार जानकारी आदानप्रदान गरिरहेको बताएको छ ।

चिनियाँ परराष्ट्र मन्त्रालयकी प्रवक्ता माओ निङले आफ्नो मानवरहित हवाई जहाजसँग सम्बन्धित जानकारी अमेरिकासँग साझा गरेको र मौसमसम्बन्धी जानकारी सङ्कलन गर्ने वायुयान अप्रत्याशित कारणले अमेरिकी आकाशमा प्रवेश गरेको जनाएकी छन् ।

तर अमेरिकाले चिनियाँ बेलुनमा मौसमसम्बन्धी जानकारी संकलन गर्ने नभएर गुप्तचर निगरानीमा प्रयोग गर्ने उपकरण फेला परेको दाबी गर्दै आइरहेको छ ।

शुक्रबार आयोजित पत्रकार सम्मेलनमा माओ निङलाई एएफपीका रिपोर्टरले यसबारे चीनको धारण के छ भनेर सोधेका थिए । जवाफमा उनले बेलुनमा रहेको उपकरणको सम्बन्धमा आफू जानकार नरहेको बताइन् ।

यसैबीच, अमेरिकाको तल्लो सदन हाउस अफ रिप्रिजेन्टेटिभ्सले बेलुनमार्फत अमेरिकाको जासुसी गर्ने चीनको प्रयासको कडा निन्दा गरेको छ।

अमेरिकाको यो कदमको आलोचना गर्दै चीनले अमेरिकी कंग्रेसको यो प्रस्ताव पूर्णतया राजनीतिक फाइदा उठाउने र यस विषयलाई नाटकीय बनाउने प्रयास भएको बताएको छ ।

चिनियाँ विदेश मन्त्रालयकी प्रवक्ता निङले राष्ट्रिय सुरक्षालाई उद्धृत गर्दै चिनियाँ नागरिकको सम्पत्ति खरिदमा प्रतिबन्ध लगाउने अमेरिकी सरकारको प्रस्तावको आलोचना गरिन् ।

उनले अमेरिकाले राष्ट्रिय सुरक्षाको अवधारणालाई बढाइचढाइ गरेर बजार अर्थतन्त्रको सिद्धान्त र अन्तर्राष्ट्रिय व्यापार नियमविपरीत गरेको बताइन् । यसले अमेरिकाप्रति विश्वको विश्वासलाई कमजोर बनाउने उनको दाबी छ ।