काठमाडौं । सत्ता साझेदार दल कांग्रेस र माओवादी केन्द्रसहितको ९ दलीय गठबन्धनले राष्ट्रपति निर्वाचनका लागि मतदाताहरूलाई बुधबार बिहानसम्म काठमाडौं आइपुग्न निर्देशन दिएको छ ।

राष्ट्रपति निर्वाचनका लागि बनेको कार्यदलको मंगलबार सिंहदरबारमा बसेको बैठकले सबै मतदातालाई तोकिएको समयमा काठमाडौं आइपुग्न निर्देशन दिएको कांग्रेसका उपसभापति पूर्णबहादुर खड्काले जानकारी दिए ।

‘बैठक सत्ता भागबण्डाको विषयमा प्रवेश गरेको छैन । राष्ट्रपति र उपराष्ट्रपति निर्वाचनलाई कसरी व्यवस्थित गर्ने विषयमा छलफल भयो । भोलि बिहान ११ बजेसम्म राजधानी बाहिर रहेका मतदातालाई फर्किन निर्देशन दिएको छ’, उनले भने ।

खड्काका अनुसार मत बदर हुन नदिन संघ र प्रदेशका सांसदहरूलाई संयुक्त रूपमा प्रशिक्षण राखिएको छ । सत्ता भागबण्डामा राष्ट्रपति र उपराष्ट्रपतिको निर्वाचनपछि केन्द्रित रहने उनले बताए ।

बैठकपछि नेकपा एसका महासचिव डा. बेदुराम भुसालले गठबन्धनलाई थप विस्तार गर्नेगरी छलफल भएको बताए ।