काठमाडौं । त्रिभुवन विश्वविद्यालयसहित आंगिक र सम्बन्धन प्राप्त क्याम्पसहरूमा आइतबार स्ववियु निर्वाचन जारी छ ।

विद्यार्थी नेतृत्व चयनका लागि बिहान ८ बजेदेखि अपरान्ह ४ बजेसम्म मतदान गर्ने समय दिइएको छ। तर आन्तरिक विवादका कारण त्रिविका १३ वटा क्याम्पसमा भने आइतबार स्ववियु निर्वाचन नहुने निर्वाचन केन्द्रीय अनुगमन तथा समन्वय समितिले जनाएको छ ।

काठमाडौं उपत्यकाभित्रका २२ अंगिक क्याम्पसहरूमध्ये त्रिचन्द्र, आर।आर। अस्कल, विश्वभाषा, मिनभवन, आयुर्वेद कीर्तिपुर र पाटन गरी ७ क्याम्पसमा निर्वाचन स्थगित भएको छ ।

त्यस्तै उपत्यका बाहिरका पृथ्वीनारायण क्याम्पस पोखरा, ठाकुरराम बहुमुखी क्याम्पस वीरगन्ज लगायतका ६ वटा क्याम्पसमा पनि स्ववियु निर्वाचन हुन नसकेको निर्वाचन समितिले जनाएको छ ।