काठमाडौं । प्रमुख प्रतिपक्षी दल एमालेले प्रधानमन्त्रीले हरेक दुई–दुई महिनामा विश्वासको मत लिएर संसदलाई बिजनेस नदिएको आरोप लगाएकाे छ ।

सोमबार प्रधानमन्त्री पुष्पकमल दाहाल प्रचण्डले राखेको विश्वासको मतको विपक्षमा उभिएकाे उसले अब कहिले विश्वासको मत लिने कार्यसूची रहेको छ भनि प्रधानमन्त्रीमाथि प्रश्न गरेकाे छ । प्रधानमन्त्रीको विश्वासको मतको विपक्षमा मत जायर गर्न सांसद विष्णुप्रसाद पाैडेलले सिंगो प्रतिनिधिसभालाई आग्रह गरे ।

प्रचण्डलाई जुन परिस्थितिमा एमालेले प्रधानमन्त्री बनाएको थियो त्यसलाई भुलेर सहमति तोडेको पौडेलले आरोप लगाए । ‘पुरानै गठबन्धनमा फर्किनु थियो भने १० पुसमा किन एमालेसँग सहकार्य गरेको ? यसको जवाफ तपाईं अहिले नदिएर भाग्न खोजेपनि इतिहासले प्रश्नको जवाफ खोजिराख्ने छन् । सहयात्री दललाई घोक्याएर राष्ट्रिय सहमति हुन सक्दैन’, प्रचण्डमाथि उनले प्रश्न राखे ।

बैठकमा एमालेको सहमतिबिना राष्ट्रिय सहमति हुन नसक्ने पौडेलले टिप्पणी गरे ।