काठमाडौं । प्रतिनिधिसभा बैठकमा यही अधिवेशनदेखि नै सांसदहरूको विद्युतीय हाजिरीको व्यवस्था हुने भएको छ ।

आइतबार बसेको प्रतिनिधिसभाको कार्यव्यवस्था समितिको बैठकले इलेक्ट्रोनिक हाजिरीको व्यवस्था गर्ने निर्णय भएको रास्वपाका प्रमुख सचेतक सन्तोष परियारले जानकारी दिए । उनका अनुसार अबदेखि सांसदहरूको हाजिरी बैठक बसेकै दिन संसदको वेबसाइटमार्फत सार्वजनिक गरिने छ ।

यसअघि संसद सचिवालयले उपलब्ध गराएको रजिष्टरमा हाजिरी गरिँदै आएको थियो । बैठकमा गणपुरक संख्यासमेत नपुग्दा पटक–पटक बैठक प्रभावित हुने गरेको थियो ।

बैठकमा सांसदहरूको न्यून उपस्थिति संख्याको अन्त्य गर्नका लागि दुई पटक हाजिरी गर्ने व्यवस्था मिलाउन सभामुखलाई सांसदहरूले ध्यानाकर्षण गराउँदै आएका थिए । विद्युतीय हाजिरीपछि उक्त समस्या हट्ने सभामुखले विश्वास लिएका छन् ।