काठमाडौं । पशुपतिनाथ मन्दिरको सुनको जलहरी जोख्न अख्तियार दुरूपयोग अनुसन्धान आयोगको टोली मन्दिर परिसर पुगेको छ ।

जलहरीका लागि प्रयोग भएर बाँकी रहेको दश किलो ९७६ ग्राम सुनको हिसाब नदेखिएपछि यसबारे महालेखा परीक्षकको कार्यालयले प्रश्न उठाएको थियो ।

आयोगले यतिबेला उक्त जलहरीमा प्रयोग भएको सुनको तौल र गुणस्तर कम भएको उजुरीमाथि छानबिन गरिरहेको छ ।

सोही अनुसन्धान अन्तर्गत आयोग आज पशुपति पुगेको हो । छानविनका लागि आयोगको टोली पशुपति पुगेपछि परिसर पुरै खाली गरिएको छ।

तत्कालिन प्रधानमन्त्री केपी शर्मा ओलीको निर्देशनमा पशुपतिमा १०८ किलोको सुनको जलहरी राखिएको थियो ।

यसमा महालेखाले करिब ११ किलो सुनको प्रयोग नभेटिएको औंल्याएको हो । जलहरीको विषयमा माओवादी केन्द्रका सांसद राजन दाहालले संसदमा प्रश्न उठाएपछि यो विषय झनै चर्चामा आएको थियो ।