काठमाडौं । सोमबार बिहान ११ बजे बस्ने भनिएको राष्ट्रिय सभा बैठक बस्दै नबसी स्थगित भएको छ। विशेष कारणवश बैठक स्थगित भएको संसद सचिवालयले जनाएको छ ।

असार १८ गते प्रधानमन्त्री पुष्पकमल दाहाल प्रचण्डले दिएको विवादास्पद अभिव्यक्तिका कारण प्रमुख प्रतिपक्ष दल एमालेले निरन्तर संसद अवरूद्ध गर्दै आएको छ ।

संघीय संसदको दुबै सदन सूचारू गर्न आइतबार प्रचण्डले विपक्षी दलका नेता केपी ओलीसँग छलफल गरेका थिए । प्रधानमन्त्रीले संसदमा स्पष्टिकरण दिएर संसदको अवरोध हटाउन तीन नेताबीच सहमति भएपनि अन्तिम समयमा भाँडिएको थियो ।

असार २१ गते प्रधानमन्त्रीको सचिवायले निकालेको प्रेस नोट आपत्तिजनक भएको भन्दै एमालेले थप छलफल नगरी संसद चल्न नदिने अडान लिएको छ । एमालेको अनावश्यक अडानका कारण आइतबार दिउँसो ३ बजे बस्ने भनिएको प्रतिनिधिसभाको बैठकसमेत स्थगित भएको छ ।

प्रधानमन्त्री पुष्पकमल दाहाल प्रचण्डको राजीनामा नआएसम्म संसद चल्न नदिने अडानमा रहेको एमाले प्रचण्डसँगको छलफलपछि केही लचिलो भएको छ ।