काठमाडौं । नेकपा (माओवादी केन्द्र) को संसदीय दलको बैठकले अवरुद्ध प्रतिनिधिसभा र राष्ट्रियसभा सुचारू गर्न सत्तापक्ष र प्रमुख प्रतिपक्षीसहित दलहरूसँग छलफल गर्ने निर्णय गरेको छ ।

सिंहदरबारस्थित पार्टी संसदीय दलको कार्यालयमा आज बिहान ८ बजेदेखि माओवादी संसदीय दलको बैठक बसेको थियो । बैठकमा प्रधानमन्त्रीसमेत रहेका दल नेता पुष्पकमल दाहाल ‘प्रचण्ड’ले सत्तापक्ष र प्रमुख प्रतिपक्षीसहित दलका नेताहरूसँग ठोस छलफल गरेर निचोड निकाल्ने र सदन सुचारू गर्ने कुरा राखेको प्रमुख सचेतक हितराज पाण्डेले जानकारी दिए।

सुन तस्करी प्रकरणको छानबिनका लागि उच्चस्तरीय समिति बनाउनुपर्ने माग राख्दै एमालेले साउन १० गतेदेखि संसद् अवरोध गर्दै आएको छ । सभामुख देवराज घिमिरेले सोमबार १ बजेका लागि प्रतिनिधिसभाको बैठक बोलाए पनि एमाले अवरोध जारी राख्ने पक्षमा देखिएको छ ।

यसैबीच, सभामुख देवराज घिमिरेले संसद्मा प्रतिनिधित्व गर्ने दलका शीर्ष नेतालाई संसदको अवरोध अन्त्य गर्ने विषयमा छलफल गर्न बोलाएका छन् ।