काठमाडौं । नेकपा (एकीकृत समाजवादी) बाट नेता तथा कार्यकर्ता पुरानो घर एमाले फर्कंने क्रम तीव्र बनेको छ । यसै सिलसिलामा अर्की एक वैकल्पिक केन्द्रीय सदस्य पनि एकीकृत समाजवादी परित्याग गरेर एमाले प्रवेश गरेकी छन् ।

नेकपा एसकी वैकल्पिक केन्द्रीय सदस्य कमला तुलाधर समाजवादी त्यागेर एमाले फर्किएकी हुन् । उनलाई एमाले अध्यक्ष केपी शर्मा ओलीले आफ्नो निवास बालकोटमा शनिबार खादा लगाएर एमालेमा प्रवेश गराए ।

गत मंसिरमा सम्पन्न प्रदेश तथा प्रतिनिधिसभाको निर्वाचनपछि माधवकुमार नेपाल नेतृत्वको एकीकृत समाजवादीलाई नेता तथा कार्यकर्ता जोगाउन चुनौती बन्दै गएको छ । हालसम्म सो पार्टीका ३ पदाधिकारी र ३१ जना केन्द्रीय सदस्य एमाले फर्किसकेका छन् । त्यस्तै, १४ जिल्लाका अध्यक्षहरू पनि पुरानै घर एमालेमा ओत लागेका छन् ।