काठमाडौं । कीर्तिपुरको थापागाउँमा गएराति चितुवाको आक्रमणमा परी एक जना घाइते भएका छन् । घाइतेको अस्पतालमा उपचार भइरहेको छ ।

कुखुरा पालन गरेको ठाउँमा सुतेका व्यक्तिलाई चितुवाले आक्रमण गरेर घाइते बनाएको हो । थानकोट प्रहरीका अनुसार गएराति एक बजेतिर खोरभित्र सुतिरहेका व्यक्तिलाई चितुवाले आक्रमण गरेको थियो ।

प्रतिरक्षा गर्दा चितुवा पनि घाइते भएको छ । घाइते चितुवा कुखुराको खोरमा थुनिएको कीर्तिपुर नगरपालिका वडानम्बर ४ का अध्यक्ष दिनेशचन्द्र दाहालले बताए ।

चितुवाको उद्धार गर्न डिभिजन वन कार्यालयको प्राविधिक टोली त्यसतर्फ जाँदै छ । वन अधिकृत अशोक पराजुलीले डार्टसहितको टोली कीर्तिपुर तर्फ लागिसकेको जानकारी दिए ।