काठमाडौं । आईसीसी टी–२० महिला विश्वकपअन्तर्गत एसियाली क्षेत्रको छनोटमा नेपालले भुटानलाई हराउँदै तेस्रो जित निकाल्न सफल भएको छ ।

मलेसियामा भइरहेको उक्त प्रतियोगितामा नेपालले भुटानलाइ तीन विकेटले हराएको हो । आइतबारको खेलमा भुटानले निर्धारित २० ओभरमा आठ विकेट गुमाएर ३९ रनमात्र बनायो ।

भुटानका लागि डेचन वाङ्मोले २१, छिरिङ् जाङ्मोले ६ रन बनाइन् । भुटानलाई सस्तैमा समेट्न पूजा महतोले तीन तथा कविता कुँवर, रुविना क्षेत्री र खुसी डंगोलले एक÷एक विकेट लिए ।

नेपालले उक्त लक्ष्य १३.२ ओभरमा सात विकेट गुमाएर पुरा गर्यो । नेपालले ४१ रन बनाएको हो । नेपालका लागि कप्तान रुबिना क्षेत्रीले १२, कविता जोशीले ९, सीता राना मगरले ८ र पूजा महतोले ३ रन बनाए ।

नेपालले अतिरिक्त नौ रन पायो । भुटानका बलर अञ्जुली घालीले तीन र छिरिङ जाङ्मोले दुई विकेट लिए । नेपालले मंगलबार कतार र बिहीबार संयुक्त अरब इमिरेट्स (यूएई) सँग प्रतिस्पर्धा गर्नेछ ।

यसअघि नेपालले पहिलो खेलमा आयोजक मलेसियालाई पाँच रन र दोस्रो खेलमा शुक्रवार बहराइनलाई १० विकेटले पराजित गरेको थियो ।