काठमाडौं । सरकारले संघीय निजामती सेवासम्बन्धी विधेयक मन्त्रिपरिषद्बाट पारित गराएको छ । आज बसेको मन्त्रिपरिषद्को बैठकले संघीय निजामति सेवाको गठन, सञ्चालन र सेवाको शर्तसम्बन्धी विधेयक, २०८० पारित गर्दै संघीय संसदमा पेश गर्ने निर्णय गरेको हो।

बैठकले निजामती सेवाका ४० जना कर्मचारीलाई पुरस्कृत गर्ने पनि निर्णय गरेको छ । आजको बैठकले चिकित्सा शिक्षा आयोगको उपाध्यक्षमा प्रा.डा. अञ्जनीकुमार झालाई नियुक्त गर्ने निर्णय गरेको छ ।

योसँगै तेजाव तथा अन्य घातक रासायनिक पदार्थ (नियमन) नियमावली, २०८० स्वीकृत गर्ने निर्णय भएको छ ।

स्वास्थ्य क्षेत्रको लैंगिक समानता तथा सामाजिक समावेशीकरण रणनीति, २०८० स्वीकृत गर्ने र संघीय शिक्षा ऐन सम्बन्धी विधेयक, २०८० संघीय संसदमा पेश गर्ने निर्णय भएका छन् ।