काठमाडौं । भारतको सिक्किममा गएको पहिरो र टिस्टा नदीमा बाढी आएपछि सम्पर्कविहीन बनेका इलामका ५ जना परिवारको सम्पर्कमा आएका छन्।

इलाम नगरपालिका-९ का सेनबहादुर कार्की, कुमार बस्नेत, नरमाया बस्नेत, खुशी कार्की र लाक्पा लामा ११ दिनपछि परिवारको सम्पर्कमा आएका हुन्।

उनीहरूले परिवारसँग सम्पर्क गरेको इलामका सहायक प्रमुख जिल्ला अधिकारी ध्रुवप्रसाद कोइरालाले जानकारी दिए। सम्पर्कविहीन बनेका सबैजना आज घर आइपुग्ने पनि उनले बताए ।

बाढीका कारण टेलिफोन, विद्युत् सेवा पनि अवरुद्ध भएकोले कसैसँग सम्पर्क स्थापित हुन नसक्दा उनीहरूको बाढीमा बेपत्ता भएको अनुमान गरिएको थियो ।

उनीहरू असोज १६ गतेदेखि सम्पर्कविहीन थिए। सोही दिन राति सिक्किम राज्यको उत्तरी भेगमा हिमतालको माथिल्लो तटीय क्षेत्रमा मुसलधारे वर्षापछि गएको पहिरो र टिस्टा नदीमा आएको बाढीले धनजनको क्षति भएको थियो । वर्षाका कारण करिब तीन हजार पर्यटक रोकिएका थिए ।