काठमाडौं । कोशी प्रदेश मुख्यमन्त्रीमा समर्थन गरेका सांसदको हस्ताक्षर सनाखत सुरू भएको छ ।

एमालेको समर्थनमा मुख्यमन्त्रीमा दाबी गरेका कांग्रेसका केदार कार्कीले आफूलाई समर्थन गरेका ४७ प्रदेश सांसदसहित सनाखतका लागि प्रदेश प्रमुखको कार्यालयमा आइपुगेका छन् । अहिले उनीहरुको सनाखत कार्य भइरहेको छ ।

सत्ता गठबन्धनको सिफारिसमा मुख्यमन्त्रीमा दाबी पेश गरेका माओवादी संसदीय दलका नेता इन्द्रबहादुर आङ्बोले सनाखत नगर्ने बताइएको छ । कांग्रेसबाट विद्रोह गर्दै डाक्टर शेखर कोइराला समूह एमालेसँग मिलेका कारण गठबन्धन उम्मेदवार र उनका समर्थक हस्ताक्षर सनाखतका लागि नआउने भएका हुन् ।

सरकार बनाउने अन्तिम विकल्प संविधानको धारा १६८ को उपधारा (५) बमोजिम मुख्यमन्त्री नियुक्त गरी सरकार गठनका लागि आह्वान गरेको सातदिने समयसीमा शुक्रबार साँझ ५ बजे सकिएपछि प्रदेश प्रमुख परशुराम खापुङले सनाखत गराउने निर्णय गरेका हुन् ।

कार्की र आङ्बोले ४७/४७ सांसदको समर्थन रहेको भनी हस्ताक्षरसहित दाबी गरेका थिए ।