काठमाडौं । त्रिकोणात्मक टी–२० आई सिरिजको फाइन आज हुँदैछ ।

सिरिजको उपाधिका लागि आज घरेलु टोली नेपाल र युएईबीच खेल हुन लागेको हो । खेल कीर्तिपुरस्थित टियु क्रिकेट मैदानमा बिहान ११ बजेबाट सुरु हुनेछ ।

फाइनल खेलमा नेपालले टस हारेको छ। युएईका कप्तान मोहम्मद वासिमले जित्दै नेपाललाई ब्याटिङको निम्तो दिएका छन् ।

सिरिजमा नेपाल र युएई शीर्ष दुईमा रहँदै फाइनल पुगेका हुन् । डबल राउण्ड रोविनका आधारमा भएको सिरिजमा नेपाल अपराजित रहँदै फाइनल पुगेको हो ।

बुधबार हङकङसँग पराजित भएको यूएई नेटरन रेटका आधारमा फाइनल प्रवेश गरेको हो । हङकङले यूएईलाई ६९ रनले पराजित गरेको थियो ।

नेपालले पहिलो खेलमा युएईलाई ७ विकेटले पराजित गरेको थियो । दोस्रो खेलमा ६ विकेटले हराएको थियो । यस्तै हङकङलाई पहिलो खेलमा ६ विकेटले र दोस्रो खेलमा ७९ रनले हराएको थियो ।

टी–२० आईमा नेपाल र यूएईबीच अहिलेसम्म कुल ७ खेल भएका छन् । जसमा नेपालले ४ खेल जित्दा यूएई तीन खेलमा विजयी भएको छ ।