काठमाडौं । अख्तियार दुरूपयोग अनुसन्धान आयोगले सञ्चारमाध्यममा प्रकाशित सुशासन प्रवर्द्धन तथा भ्रष्टाचार नियन्त्रणमा योगदान पुर्याउने उत्कृष्ट समाचार तथा लेखलाई पुरस्कृत गर्ने भएको छ ।

यही माघ २८ गते परेको आफ्नो स्थापना दिवसको अवसरमा आयोगले पत्रपत्रिका, अनलाइन, रेडियो, टिभीमा यसअघि प्रकाशित उत्कृष्ट समाचार तथा विचारलाई पुरस्कृत गर्न लागेको हो ।

त्यसका लागि पत्रकार तथा लेखकसँग समाचार तथा लेख मागिएको आयोगले जनाएको छ । लेख तथा समाचार आयोगको केन्द्रीय कार्यालय वा इमेल ठेगानामार्फत उपलब्ध गराउन सकिनेछ ।

बिहीबार एक सूचना प्रकाशित गर्दै आयोगले माघ १९ गते ४ बजेसम्म त्यस्ता सामग्री उपलब्ध गराउन आग्रह गरेको छ । त्यस्ता सामग्री नेपाली र अंग्रेजीमा लेखिएको हुनु पर्नेछ । लेख ७०० शब्दको हुनुपर्नेछ भने समाचारको हकमा शब्दको सीमा तोकिएको छैन ।

स्थापना दिवसकै अवसरमा आयोगले निबन्ध लेखन प्रतियोगिता पनि आयोजना गर्दैछ । आयोग मातहतका सात वटा कार्यालयमार्फत कक्षा ९ देखि कक्षा १२ कक्षासम्म अध्ययनरत विद्यार्थीबीच निबन्ध लेखन प्रतियोगिता आयोजना गर्न लागिएको हो ।

‘भ्रष्टाचार नियन्त्रण र सुशासन प्रवर्द्धन’ विषयक निबन्ध लेखनमा सहभागी हुन आयोगले विद्यार्थीहरूलाई आग्रह गरेको छ । प्रतियोगितामा प्रथम, द्वितीय र तृतीय स्थान हासिल गर्न सफल प्रतियोगीलाई कार्यालयस्तरमा नै पुरस्कृत गरिने आयोगले जनाएको छ ।