ऋण उठाउन ‘सहकारी पुराण’ !
बागलुङ । ऋणीहरूले समयमा साँवा तथा ब्याज भुक्तानी गर्न आनाकानी गरेपछि बागलुङको एक सहकारीले धार्मिक बाटो रोज्ने भएको छ । सिवाइसी बचत तथा ऋण सहकारी संस्थाले ऋणीहरूको सचेतनाका लागि ‘सहकारी पुराण’को योजना सार्वजनिक गरेको हो ।
“पुराणमा कसैको ऋण खानु, नतिर्नु पाप हो भनेर उल्लेख भएको चर्चा हुन्छ, त्यसैले अब हामीले सहकारी पुराणमार्फत सहकारी शिक्षा प्रदान गर्ने योजना बनाएका छौँ”, सहकारीका अध्यक्ष चण्डीप्रसाद शर्माले भने, “नाम चलेका पण्डित बोलाएर भव्य सहकारी पुराण गर्ने योजना छ ।” सहकारीले पत्रकार सम्मेलन गरेर विभिन्न कार्यक्रम सार्वजनिक गरेको हो ।
सहकारी पुराण कुनै धार्मिक कार्यक्रमभन्दा पनि सहकारी शिक्षाको कार्यक्रम हुने शर्माले दाबी गरे । “पुराणमा सहभागिताका लागि ऋण नतिर्नेलाई बोलाइने छ, अन्य शेयर सदस्यलाई पनि सहभागी गराइने छ, सहकारी पुराणले ऋण नतिर्नेलाई ज्ञान दिने छ”, शर्मा भने, “नियमावलीमा तोकिएका प्रक्रियामा जानुपूर्व हामीले सचेतनामार्फत नै ऋण भुक्तानीको बाटो खोजेका हौँ ।”
सहकारी संस्थाबाट लिएको ऋण तिर्नु पर्दैन भन्ने भाष्य सिर्जना गर्न खोजिएको भन्दै शर्माले कुनै एक शेयर सदस्यले लिएको ऋण अरु सयौँ शेयर सदस्यको बचत भएकाले नतिरेर सुख नपाइने बताए । सहकारीले ऋण असुलीको नयाँ विधिसँगै बचतको नयाँ कार्यक्रम पनि सार्वजनिक गरेको छ ।
शेयर सदस्यमा बचत गर्ने बानी विकास गर्नका लागि यस वर्ष सङ्कल्प क्रमिक बचत कार्यक्रम सञ्चालन गरिने अध्यक्ष शर्माले बताए । न्यूनतम रु १० लाख पुग्नेगरी पाँचदेखि २० वर्षसम्मको सङ्कल्प बचत गर्न चाहनेलाई यो योजनामा सहभागी गराइने उनले बताए। न्यून आय भएका शेयर सदस्यले मासिक बचत गर्ने सङ्कल्प गराएर यो बचत सुरु गर्दा उनीहरू धनी बन्ने बाटो खुल्ने शर्माले दाबी गरे ।
ताजा अपडेट
-
सहकारी ठगीमा संसदीय समिति बनाउन सहमति, कानूनमन्त्रीको नेतृत्वमा मस्यौदा कार्यदल गठन
-
राष्ट्रिय परिचयपत्र हुनेले अब लाइसेन्स बोक्नु नपर्ने
-
२५ चालकमाथि चेकजाँच हुँदा ६ जनाले लागुऔषध सेवन गरेर सवारी चलाएको भेटियो
-
नेपाल प्रहरीका चार एसएसपीको डिआइजीमा बढुवा सिफारिस, यही ब्याचबाट आइजिपी हुने
-
ट्रकको ठक्करबाट धादिङमा मोटरसाइकल चालकको मृत्यु
प्रतिक्रिया