काठमाडौं । मध्यपश्चिमाञ्चल विश्वविद्यालय (मप) र सुदूरपश्चिम विश्वविद्यालय (सुप) को उपकुलपतिको स्थगित दरखास्त आह्वान प्रक्रिया पुनः अघि बढेको छ ।

दुवै विश्वविद्यालयको उपकुलपति नियुक्तिका लागि नाम सिफारिस गर्न गठित छनोट तथा सिफारिस समितिको सोमबारको निर्णयानुसार यसअघि स्थगित दरखास्तसम्बन्धी प्रक्रिया मंगलबार पुनः सञ्चालन गरिएको हो ।

योग्यता पुगेका इच्छुक उम्मेदवारले चैत १६ गते कार्यालय समयभित्र आवेदन दिन सक्ने छनोट समितिले जनाएका छन् ।

उपकुलपति नियुक्तिका लागि दुवै विश्वविद्यालयले यसअघि दरखास्त आह्वान गरेकोमा केहीले सहभागिता जनाएका थिए । तर गत फागुन ६ गते एकाएक दुवै विश्वविद्यालयको उपकुलपति छनोटका लागि थालिएको आवेदन प्रक्रिया स्थगन हुन पुगेको थियो ।

छनोट समितिका अनुसार, गत माघ २५ गते प्रकाशित सूचनाका आधारमा यसअघि आवेदन दिएकाले भने पुनः आवेदन दिनु पर्दैन । उनीहरूलाई यसअघि दिएको आवेदनकै आधारमा प्रक्रियामा सामेल गरिनेछ ।