काठमाडौं । ताइवानमा ७.४ रेक्टर स्केलको शक्तिशाली भूकम्प गएको छ । ताइवानको पूर्वी तट केन्द्रबिन्दु भएर बुधबार बिहान भूकम्प गएको हो ।

भूकम्पको केन्द्रबिन्दु हुलियन सहरबाट करिब १८ किलोमिटर दक्षिण पर्छ । यो ताइबानमा पछिल्लो २५ वर्षयता गएको सबैभन्दा ठूलो भूकम्प हो ।

समाचारहरूमा भूकम्पबाट भवनहरू भत्किएको र विद्युत् आपूर्ति बन्द भएको जनाइए पनि क्षतिको विस्तृत विवरण आउन बाँकी छ ।

यो भूकम्पपछि ताइवानमा लगातार परकम्पहरू गइरहेका छन् । एएफपीका अनुसार केही समयअघि मात्रै ६.५ म्याग्निच्युड परकम्प गएको छ ।

भूकम्पको धक्का चीनमा समेत महसुस भएको छ । चिनियाँ सरकारी मिडियाका अनुसार, फुजियान प्रान्तका भूकम्पको झड्का महसुस भएको छ ।

उता ताइवानको अर्को छिमेकी देश जापानमा भने सुनामीको चेतावनी दिइएको छ । त्यहाँको मौसम विज्ञान विभागले मियाकोजिमा र ओकिनावा द्वीपमा सुनामीको खतरा औंल्याएको हो । सुनामीको सम्भावना देखिएपछि तटीय क्षेत्रमा सतर्कता अपनाउन सुझाइएको छ ।

जापानपछि फिलिपिन्सले पनि सुनामीको चेतावनी जारी गरेको छ । समाचार एजेन्सी एएफपीका अनुसार, प्रशासनले तटीय इलाका खाली गर्न भनेको छ ।