काठमाडौं । कोशी प्रदेशका मुख्यमन्त्री हिक्मतकुमार कार्कीले आज विश्वासको मत लिने भएका छन् ।

प्रदेश प्रमुख परशुराम खापुङले कोशी प्रदेशसभाको पाँचौं अधिवेशन अहिले बिहान ११ बजे बस्ने गरी आह्वान गरेका छन् । कोशी प्रदेश सरकारको ०८१ वैशाख २७ को सिफारिस अनुसार नेपालको संविधानको धारा १८३ को उपधारा (१) बमोजिम उनले उक्त आह्वान गरेका हुन् ।

कोशी प्रदेशसभा सचिवालयले आजदेखि सुरु हुन लागेको पाँचौं अधिवेशनको पहिलो बैठकबाट मुख्यमन्त्री कार्कीले विश्वासको मत लिन लागेको जनाएको छ ।

यही वैशाख २७ गते कोशी प्रदेशको मुख्यमन्त्रीमा नियुक्त कार्कीले सोही दिन साँझ पद तथा गोपनीयताको शपथ लिएका थिए । उनलाई नेकपा (एमाले) का ३९, नेकपा (माओवादी केन्द्र) का १३ सहित ५२ प्रदेशसभा सदस्यको साथ र समर्थन रहेको छ ।

आजको बैठकमा नेपालको संविधानको धारा १६८ को उपधारा (४) बमोजिम तथा कोशी प्रदेशसभा नियमावली, २०७४ (पहिलो संशोधन समेत) को नियम १२८ बमोजिम कोशी प्रदेशका मुख्यमन्त्री कार्कीले विश्वासको मत लिने बैठकको कार्य सूची छ ।