काठमाडौं । नेकपा माओवादी केन्द्रका सांसद माधव सापकोटाले बजेट क्यालेण्डर नै बनाएर काम गर्नुपर्ने आवश्यकता औंल्याएका छन् ।

आगामी आर्थिक वर्ष २०८१/८१ राजस्व र व्ययको वार्षिक अनुमानमाथि सामान्य छलफलमा सहभागी हुँदै उनले यस्तो बताएका हुन् ।

बजेट क्यालेण्डर निर्माण गरेर काम नगर्ने हो भने असारे विकासको पुनरावृत्ति हुने खतरा रहेको उनले बताए । ‘ठेक्का लगाउने कार्यालय, प्रोजेक्ट म्यानेजर सबैले राम्रोसँग अनुगमन गरेर काम गरे पनि नगरेपनि तलब पाक्ने व्यवस्था छ । काम नगर्दा दण्डित र काम गर्दा पुरस्कृत हुने बजेट क्यालेण्डर नै बनाउनुपर्ने आवश्यकता म देख्दछु,’ उनले भने ।

योसँगै सार्वजनिक खरिद ऐनको बारेमा गम्भीर बहस नै चलाउनुपर्ने माग पनि उनले राखेका छन् ।

आगामी वर्षको बजेट सफल कार्यान्वयन हुन सकेमा डेढ दशककै सबैभन्दा उत्कृष्ट बजेट र सफल अर्थमन्त्रीका रुपमा सम्भावना पनि रहने उनको दाबी छ । त्यसका लागि हालका चुनौतीलाई सम्बोधन गर्न पनि लाग्नुपर्ने उनको सुझाव छ ।