काठमाडौं । सार्वजनिक खरिद अनुगमन कार्यालयले १५ निर्माण कम्पनी तथा फर्ममाथि कारबाही प्रक्रिया अघि बढाएको छ । सम्झौताअनुरूप काम नगरेको उल्लेख गर्दै यी कम्पनी तथा फर्मलाई कालोसूचीमा राख्न विभिन्न सरकारी निकायले अनुरोध गरेपछि कार्यालयले सातदिने स्पष्टीकरण सोधेर आवश्यक प्रक्रिया थालेको हो ।

विभिन्न सरकारी निकायले १५ निर्माण तथा आपूर्तिकर्तालाई कालोसूचीमा राख्न लेखी पठाएपछि कार्यालयले उनीहरूको ठेगानामा कालोसूचीमा राख्न नपर्ने कारण भए ३० दिनभित्र पेश गर्न पत्राचार गरेको थियो । उक्त अवधिमा उनीहरूले जवाफ पेश नगरेपछि सातदिने स्पष्टीकरण सोधिएको कार्यालयले जनाएको छ ।

स्पष्टीकरण सोधिएका निर्माण तथा आपूर्ति कम्पनीमा आर.आर कन्स्ट्रक्सन प्रालि, सेक्टर कन्सलटेन्ड एण्ड डेभलपर्स, ज्योति निर्माण सेवा र युभी इन्जिजिनीयरिङ कन्सल्टेन्सी एण्ड कन्स्ट्रक्सन प्रालि, विमोर निर्माण सेवा, महिमा कन्स्ट्रक्सन, अमन कन्स्ट्रक्सन र सत्यश्वर कन्स्ट्रक्सन प्रालि छन् । यसमध्ये युभी इन्जिनीयरिङलाई तीन वटा निकायले कालोसूचीमा राख्न प्रस्ताव गरेका छन् ।

त्यसैगरी, सुदर्शन निर्माण सेवा, संयुक्त अरब इमिरेट्सको एसटिके ग्लोबल एफजेसी, रक्षा कन्स्ट्रक्सन र नेपाल विल्डर्सलाई पनि कार्यालयले स्पष्टीकरण सोधेको छ ।