काठमाडौं । नेपाल कम्युनिस्ट पार्टी (एमाले) बाट निष्कासित नेता भीम रावलले आज पत्रकार सम्मेलन गर्दैछन् ।

पार्टीबाट निष्कासित भएपछि पहिलो पटक रावलले औपचारिक धारणा सार्वजनिक गर्न पत्रकार सम्मेलन आयोजना गर्न लागेका हुन् ।

एमालेले गरेको कारबाही र भावी योजनाबारे जानकारी दिन बुधबार दिउँसो १ बजे कार्की ब्यांक्वेट, बबरमहलमा पत्रकार सम्मेलन गर्न लागेको रावलको सचिवालयले जनाएको छ ।

एमालेबाट निष्कासित रावलले एमालेभित्रका असन्तुष्ट र बाहिर रहेका अन्य व्यक्ति समेटेर गैरकम्युनिस्ट दल खोल्न लागेको प्रचार भइरहेको छ । रावलको सचिवालयले भने प्रचार गरिएजस्तो हतारमा दल खोल्ने पक्षमा उनी नरहेको स्पष्ट पारेको छ ।

एमालेको वर्तमान नेतृत्वविरुद्ध फरक मत राख्दै आएका रावल यसकै कारण लामो समयदेखि किरानामा पर्दै आएका थिए । ०७९ को प्रतिनिधिसभा निर्वाचनमा टिकट नै नदिएका एमाले अध्यक्ष केपी शर्मा ओलीले पार्टीमा पनि उनलाई भूमिकाविहीन बनाएर राखेका थिए ।

पार्टी कार्यालय निर्माणका लागि विवादास्पद व्यापारी मीनबहादुर गुरुङबाट जग्गा लिने निर्णयको विरोध गरेपछि रावल झनै ओलीको तारो बन्न पुगेका थिए । उक्त प्रकरणपछि एमालेले पार्टी अनुशासनविपरीत गएर अभिव्यक्ति दिएको भन्दै रावलसँग स्पष्टीकरण सोधेको थियो । तर रावलले स्पष्टीकरणको जवाफ दिएनन् । यहीबीच गत पुस १० गतेको सचिवालय बैठकले पार्टी अनुशासनविपरीतको कार्य लगातार जारी राखेको भन्दै रावललाई पार्टीको संगठित सदस्यबाट समेत हटाउने निर्णय गरेको थियो ।