काठमाडौं । काठमाडौंको कालीमाटीस्थित स्वर्णलक्ष्मी सहकारी ठगीमा तानिएका राष्ट्रिय स्वतन्त्र पार्टी (रास्वपा) का सभापति रवि लामिछानेलाई जिल्ला अदालत काठमाडौंमा उपस्थित गराइएको छ ।

आइतबार सुरु भएको थुनछेक बहसमा सामेल गराउन उनलाई प्रहरीले बुधबार बिहान कार्यालय खुलेपछि अदालतमा उपस्थित गराएको हो ।

जिल्ला अदालत काठमाडौंमा रविविरुद्ध सहकारी ठगी र संगठित अपराधको अभियोग लगाएर मुद्दा दायर भएको छ ।

जिल्ला अदालत कास्कीको आदेशबाट ६५ लाख धरौटीमा रिहा भएर काठमाडौंमा हाजिर भएका रविको मुद्दा जिल्ला न्यायाीध माधवप्रसाद अधिकारीको इजलासमा परेको छ । जसमा सरकारी वकिल र जाहेरीवाला वकिलको तर्फबाट थुनछेक बहस सकिएको छ भने बुधबारबाट रवि पक्षका वकिलले बहस गर्नेछन् । सरकारी वकिल र जाहेरवालातर्फका वकिलले रवि सहकारी ठगीमा संलग्न भएको जिकिर गर्दै उनलाई थुनामा पठाउनुपर्ने माग गरेका छन् । त्यसपछि जाहेरवाला र सरकारी वकिलको जवाफी बहस हुनेछ ।

थुनछेक बहसको प्रक्रिया सकिएपछि न्यायाधीशले साधारण तारखे र धरौटीमा छाड्ने या पुर्पक्षका लागि थुनामा पठाउनेमध्ये कुनै एक आदेश दिनेछन् ।