काठमाडौ । काठमाडौंको कालीमाटीस्थित स्वर्णलक्ष्मी सहकारी ठगीमा मुछिएका रास्वपा सभापति रवि लामिछानेलाई धरौटीमा छाड्न काठमाडौं  जिल्ला अदालतले आदेश दिएको छ ।

जिल्ला अदालत काठमाडौंका न्यायाधीश माधवप्रसाद अधिकारीको इजलासले बुधबार थुनछेक बहस सकिएपछि लामिछानेलाई धरौटीमा छाड्न आदेश दिएको हो ।

थुनछेक बहसका क्रममा सरकारी वकिल र जाहेरवाला वकिलले रविलाई पुर्पक्षका लागि कारागार चलान गर्नुपर्ने माग गरेका थिए । लामिछानेलाई छाड्दा प्रमाण नष्ट हुने उनीहरूको जिकिर थियो । तर अदालतले रविलाई राहत दिँदै धरौटीमा छाड्न आदेश गरेको हो । योसँगै रविलाई धरौटी बुझाएर हिरासतमुक्त हुने बाटो खुलेको छ ।

यसअघि जिल्ला अदालत कास्कीले पनि रविलाई धरौटीमा छाड्न आदेश गरेको थियो ।

गोरखा मिडिया प्रालिका तत्कालीन प्रबन्ध निर्देशक लामिछानेविरूध्द अझै तीन जिल्लाको सहकारी ठगेको अभियोग छ ।