काठमाडौं । नेपाल विद्युत् प्राधिकरणका कार्यकारी निर्देशक कुलमान घिसिङलाई हटाउने सरकारको निर्णयविरुद्ध मंगलबार बिहान प्रदर्शन भएको छ ।

नेकपा (एकीकृत समाजवादी) निकट विद्यार्थी संगठन अनेरास्ववियुले काठमाडौंको प्रदर्शनीमार्गमा सरकारले गरेको निर्णयविरुद्ध प्रदर्शन गरेका हुन् ।

यसक्रममा उनीहरूले सरकारविरुद्ध नाराबाजी गर्दै कुलमान हटाउने निर्णय फिर्ता लिन माग गरेका थिए ।

विद्यार्थीहरूले ऊर्जा मन्त्री दीपक खड्काको पुत्लासमेत जलाए । मन्त्रीको पुत्ला दहनपछि प्रहरीले हस्तक्षेपको प्रयास गर्दा केहीबेर तनावसमेत भएको थियो ।

मन्त्रिपरिषद्को सोमबार बसेको बैठकले नेपाल विद्युत् प्राधिकरणका कार्यकारी निर्देशक घिसिङलाई हटाएर हितेन्द्र देव शाक्यलाई नियुक्त गर्ने निर्णय गरेको थियो । सरकारले गोप्य राखेको निर्णय मन्त्रीले सार्वजनिक गरिदिएपछि यसको चौतर्फी विरोध भइरहेको छ ।