काठमाडौं । आगामी फागुन २१ का लागि तय प्रतिनिधिसभा निर्वाचनको प्रत्यक्षतर्फको १६५ क्षेत्रको उम्मेदवारी मनोनयन दर्ता सुरु भएको छ ।

निर्वाचन आयोगको निर्धारित कार्यतालिकाअनुसार अहिले बिहान ११ बजेबाट उम्मेदवारी मनोनयन सुरु भएको हो ।

निर्वाचन आयोगले अहिले बिहान १० बजेबाट उम्मेदवारी मनोनयन सुरु भएको जनाएको छ । आयोगका अनुसार मनोनयन दर्ता साँझ ५ बजेसम्म चल्नेछ ।

दल तथा स्वतन्त्रबाट उम्मेदवारी दिन लागेकामध्ये कतिपय सम्बन्धित निर्वाचन कार्यालयमा पुगिसकेका छन् भने कतिपय तयारीमा जुटेका छन् ।

निर्वाचन आयोगका अनुसार उम्मेदवार मनोनयन दर्ता गर्दा १० किसिमका कागजात आवश्यक पर्छन् । जसमा नेपाली नागरिकताको प्रमाणपत्रको प्रतिलिपि वा मतदाता परिचयपत्रको प्रतिलिपि, उम्मेदवारको नाम कुनै गाउँपालिका वा नगरपालिकाको अन्तिम मतदाता नामावलीमा समावेश भएको निस्सा छन् । त्यस्तै, उम्मेदवार सरकार वा सरकारी स्वामित्वको संस्थामा बहाल छन् भने, सो पदबाट राजीनामा दिएको प्रमाण पनि पेश गर्नुपर्नेछ ।

प्रचलित कानुन अनुसार योग्यता पुगेको उम्मेदवारले मनोनयन दर्ता गर्दा सोही निर्वाचन क्षेत्रको अन्तिम मतदाता नामावलीमा नाम भएका एक जना प्रस्तावक र एक जना समर्थकको विवरण र हस्ताक्षर सहितको मनोनयन पत्र पेस गर्नुपर्नेछ ।

दलको तर्फबाट उम्मेदवारी दिएको भए दलको केन्द्रीय कार्यकारिणी समितिले जारी गरेको औपचारिक मनोनयन पत्र अनिवार्य बुझाउनुपर्नेछ । संयुक्त दलको हकमा छुट्टै ढाँचाको पत्र आवश्यक हुने आयोगले जनाएको छ ।

आयोगका अनुसार, प्रतिनिधिमार्फत उम्मेदवारी दर्ता गर्नेले प्रतिनिधिमार्फत तोकेको फाराम अनिवार्य भर्नुपर्नेछ ।