काठमाडौं । गृह मन्त्रालयले संगठनभित्र छलफल र अध्ययन नगरी सशस्त्र प्रहरी कर्मचारीको सेवा अवधि ३० र्षबाट ३२ वर्ष पुर्याउने गृहकार्य अघि बढाएको छ ।

सेवा अवधि ३२ वर्ष कायम हुने गरी सशस्त्र प्रहरी नियमावलीको संशोधन मस्यौदा तयार गरेर गृहले सैद्धान्तिक सहमतिका लागि अर्थ मन्त्रालयमा पठाइसकेको छ ।

संगठनमा कुनै दीर्घकालीन र रणनीतिक महत्त्वका विषयमा निर्णय लिन वा गृह मन्त्रालयमा सिफारिस प्रस्ताव गर्न डिआइजी र त्यसमाथिका अधिकृत सम्मिलित प्रिन्सिपल स्टाफ कमिटीको बैठक बस्छ । तर सेवा अवधि बढाउने प्रस्तावमा सशस्त्रमा कुनै छलफल नै नभएको स्रोतले जनाएको छ । सशस्त्र प्रहरी प्रवक्ता डिआइजी विदुर खड्काले पनि सेवा अवधि ३२ वर्षे पुर्याउने विषयमा अनभिज्ञता जनाए ।

गृह मन्त्रालयका प्रवक्ता फणीन्द्रमणि पोखरेलले भने नियमावली संशोधन मस्यौदा गृहबाट अर्थ पुगेको तर त्यसबारे कुनै जानकारी नआएको बताए । आजको कान्तिपुर दैनिकमा खबर छ ।