मुम्बई। आईसीसी टी-२० विश्वकप २०२६ अन्तर्गत समूह ‘सी’ को आफ्नो तेस्रो खेलमा नेपालले आज वेस्ट इन्डिजसँग प्रतिस्पर्धा गर्दैछ। खेल बिहान ११:१५ बजे मुम्बईस्थित वानखेडे स्टेडियममा सुरु हुनेछ।

खेल सुरु हुनुभन्दा करिब तीन घण्टा अगावै नेपाली समर्थकहरू स्टेडियमबाहिर उपस्थित भएका छन्। बिहानैदेखि मरिन ड्राइभ क्षेत्रमा नेपाली झण्डा, टोलीका जर्सी र बाजागाजासहित समर्थकहरूको बाक्लो उपस्थिति देखिएको छ। “नेपाल-नेपाल”को नारासँगै उनीहरूले खेलाडीलाई हौसला प्रदान गरिरहेका छन्।

समूह चरणमा अगाडि बढ्नका लागि नेपाललाई आजको खेल जित्नैपर्ने दबाब छ। अघिल्ला खेलहरूको नतिजापछि अंक तालिकामा प्रतिस्पर्धा कडा बनेको छ, जसका कारण वेस्ट इन्डिजविरुद्धको खेल नेपालका लागि निर्णायक मानिएको छ।

नेपाली टोली उच्च मनोबलका साथ मैदान उत्रने तयारीमा छ भने समर्थकहरूको उत्साहले मुम्बईको माहोल नै नेपालीमय बनेको छ। खेल रोमाञ्चक हुने अपेक्षा गरिएको छ।