काठमाडौँ । कीर्तिपुर नगरपालिकाका पूर्व प्रमुख रमेश महर्जन र वडा नम्बर ६ का पूर्व अध्यक्ष नुच्छे महर्जनले नेपाली कम्युनिस्ट पार्टी (नेकपा)मा औपचारिक रूपमा प्रवेश गरेका छन्। यसअघि उनीहरू नेपाल कम्युनिस्ट पार्टी (एमाले)सँग आबद्ध रहेका थिए।

आइतबार पार्टी केन्द्रीय कार्यालय पेरिसडाँडामा आयोजित कार्यक्रममा पार्टी संयोजक पुष्पकमल दाहाल तथा नेता बामदेव गौतम लगायतले उनीहरूलाई स्वागत गरेका हुन्। सो अवसरमा दाहालले विभिन्न कम्युनिस्ट शक्तिहरूको एकताबाट निर्माण भएको वर्तमान राजनीतिक मोर्चा आगामी दिनमा अझ व्यापक सहकार्यतर्फ अघि बढ्ने विश्वास व्यक्त गरेका थिए। उनले राष्ट्रवादी धाराका शक्तिहरूबीच सहकार्य बढ्दा समग्र राजनीतिक वातावरणमा सकारात्मक प्रभाव पर्ने धारणा राखे।

नवप्रवेशी नेताहरूले आगामी निर्वाचनमा पार्टीका उम्मेदवारलाई विजयी बनाउन सक्रिय भूमिका निर्वाह गर्ने प्रतिबद्धता जनाएका छन्। साथै पूर्वमेयर महर्जनले अघिल्लो कार्यकालमा शक्तिशाली सरकार हुँदा पनि अपेक्षाअनुसार परिणाम दिन नसकिएको टिप्पणी गर्दै तत्कालीन प्रधानमन्त्री केपी शर्मा ओली को नेतृत्वप्रति आलोचनात्मक धारणा व्यक्त गरेका थिए।