काठमाडौँ । राष्ट्रिय तथ्यांक कार्यालयले चालु आर्थिक वर्ष २०८२/८३ मा देशको आर्थिक वृद्धिदर ३.८५ प्रतिशत रहने अनुमान सार्वजनिक गरेको छ ।

मंगलबार आयोजित एक कार्यक्रममा कार्यालयले प्रस्तुत गरेको प्रक्षेपण अनुसार यस वर्षको आर्थिक गतिविधि केही सुस्त रहने देखिए पनि कुल अर्थतन्त्रको आकार भने विस्तार हुने अपेक्षा गरिएको छ ।

कार्यालयका अनुसार चालु आर्थिक वर्षमा नेपालको अर्थतन्त्रको कुल आकार करिब ६६ खर्ब रुपैयाँ पुग्ने अनुमान गरिएको छ ।

आर्थिक वृद्धिदर अपेक्षाकृत सीमित रहनुमा केही क्षेत्रमा उत्पादन घट्नु प्रभावकारी कारक रहेको जनाइएको छ । विशेष गरी धान उत्पादनमा कमी आएको उल्लेख गरिएको छ ।

यद्यपि विद्युत् तथा ग्यास क्षेत्रको उत्पादन र विस्तारले समग्र आर्थिक वृद्धिलाई केही हदसम्म टेवा दिएको तथ्यांक कार्यालयले जनाएको छ ।

त्यसैगरी आर्थिक सूचकहरूको सुधारका लागि अन्तरिम सरकारले गरेका केही प्रयास सकारात्मक देखिएको निष्कर्ष पनि कार्यालयले प्रस्तुत गरेको छ ।