नुवाकोटको टोखा-छहरे सडकखण्डमा अत्यावश्यक सेवाबाहेक अन्य सार्वजनिक तथा निजी सवारीसाधन सञ्चालनमा रोक लगाइएको छ। प्रहरीका अनुसार उक्त सडकमा राति १० बजेदेखि बिहान ५ बजेसम्म सवारी आवागमन बन्द गरिएको छ।

रसुवाको पासाङ ल्हामु राजमार्ग भने पूर्ण रूपमा अवरुद्ध भएको छ। त्रिशुली नदीको कटान र बाढीका कारण सडकको ठुलो भागमा क्षति पुगेको छ। प्रहरीले वैकल्पिक मार्गका रूपमा काठमाडौं-टोखा-छहरे-विदुर हुँदै धुन्चे-स्याफ्रुबेंसीसम्मको सिंगल लेन कच्ची सडक प्रयोग गर्न सकिने जनाएको छ।

त्यस्तै, पहिरो, लेदो, बाढी र सडक भासिएका कारण अन्य जिल्लाका सडक पनि प्रभावित बनेका छन्। मनाङको बेँसीसहर-खाङसार, गुल्मीको कालीगण्डकी करिडोर, म्याग्दीको बेनी-जोमसोम, मुस्ताङको जोमसोम-कोरला, नवलपरासी पूर्वको कालीगण्डकी करिडोर र लमजुङको मध्यपहाडी लोकमार्गका विभिन्न स्थानमा यातायात अवरुद्ध भएको छ।