काठमाडौं । दसैँ मनाउन काठमाडौं उपत्यकाबाट घर फर्किने यात्रुको सङ्ख्या बढ्दै गएको छ । असोज २५ र २६ गते दुई दिनमा मात्रै एक लाख नौ हजार ६३६ जना यात्रु उपत्यकाबाट बाहिरिएका छन् ।

काठमाडौं उपत्यका ट्राफिक प्रहरी कार्यालय रामशाहपथका प्रमुख प्रहरी वरिष्ठ उपरीक्षक (एसएसपी) सुरेश काफ्लेका अनुसार थानकोट–नागढुङ्गा, साँगा र दक्षिणकालीलगायतका नाकाबाट उक्त सङ्ख्यामा यात्रु बाहिरिएका हुन् ।

बाहिरिने यात्रुमध्ये ६७ हजार ६९० पुरुष र ४१ हजार ९४६ महिला रहेका छन् । प्रहरीका अनुसार असोज २५ गते ५२ हजार ८२७ जना र २६ गते ५६ हजार ८०९ जना यात्रु उपत्यकाबाट बाहिरिएका थिए । असोज २७ गतेको तथ्याङ्क भने प्राप्त भइनसकेको प्रहरीले जनाएको छ ।

दसैँमा घर जाने यात्रुको चाप बढेसँगै ट्राफिक प्रहरीले उपत्यकाका विभिन्न स्थानमा यात्रु सहायता कक्ष स्थापना गरेको छ । सहायता कक्षमार्फत टिकटमा हुने कालोबजारी, ठगी तथा यात्रुका गुनासो सम्बोधन गर्ने काम भइरहेको एसएसपी काफ्लेले जानकारी दिए ।

दसैँका लागि उपत्यका छाड्ने यात्रुको सङ्ख्या बढिरहेका बेला यात्रालाई सहज, सुरक्षित र व्यवस्थित बनाउन ट्राफिक प्रहरीले निगरानी तथा यात्रु सहायता गतिविधिलाई प्राथमिकता दिएको छ ।