काठमाडौं । शीर्ष स्थानको गुजरात टाइटन्स इण्डियन प्रिमियर लिग (आइपिएल) मा पञ्जाव किङ्ससँग पराजित भएको छ । गएराति सम्पन्न खेलमा गुजरात ८ विकेटले पराजित भएको हो ।

गुजरातले दिएको १४४ रनको लक्ष्य पञ्जाबले १६ ओभरमा २ विकेट गुमाएर पूरा गर्यो । पञ्जावका लागि शिखर धवनले ६२ रनको अर्धशतकीय पारी खेले भने भानुका राजपाक्षेले ४०, लियाम लिभिङस्टोनले अविजित ३० रनको योगदान दिए ।

पहिले ब्याटिङ गरेको गुजरातले १ सय ४३ रन बनायो । २० ओभरमा ८ विकेट गुमाएर उसले १ सय ४३ रन बनाएको हो । गुजरातका लागि साई सुदर्शनले ६५ रनको अर्धशतकीय पारी खेले भने रिद्धिमान शाहले २१ रनको योगदान दिए ।

योसँगै पञ्जाब १० खेलबाट १० अंक जोडेर पाँचौं स्थानमा उक्लिएको छ भने १० खेलमा ८ जित र २ हार व्यहोरेको गुजरात १६ अंकका साथ शीर्ष स्थानमा कायम छ ।