काठमाडौं । सरकारले तोकेको स्वास्थ्य मापदण्ड पालनामा अभिभावकले उदासीनता देखाउँदा धमाधम बालबालिका संक्रमित हुन थालेका छन् ।

बालबालिकाको संक्रमित दर बढ्दा कान्ति बाल अस्पतालको कोभिड बिरामीका लागि छुट्याइएका २६ बेड नै भरिएका छन् । चार वटा भेन्टिलेटर पनि प्याक छन् । कोभिड बिरामी नवरात शिशुदेखि १३ वर्षसम्मका उपचाररत छन् । सबैजसो बिरामीका आफन्त वा अभिभावकबाटै संक्रमण सरेको चिकित्सकहरूको अनुमान छ ।

अस्पतालका निर्देशक डा. अजित रायमाझी खोप लगाएका धेरैजसो अभिभावकले स्वास्थ्य मापदण्ड पालनामा हेलचेक्रयाइँ गर्दा समस्या देखिएको बताउँछन् । खोप लगाएका व्यक्ति संक्रमित भए पनि लक्षण नदेखाउने भएकाले सचेत हुनुपर्ने उनको सुझाव छ ।

अभिभावककै कमजोरीका कारण कतिपय अभिभावक अस्पताल आउनु परेको उनले बताए ।

स्वास्थ्य मन्त्रालयले हरेक दिन सार्वजनिक गर्ने तथ्यांकमा संक्रमितको संख्या घट्दै गएको देखिन्छ । तर समुदायमा भएको संक्रमणको हिसाब मनत्रालयसँग छैन । सबैभन्दा बढी जोखिममा खोप नलगाएका छन् । कान्तिपुरका अनुसार, सरकारले ५ देखि ११ वर्षका बालबालिकालाई खोप दिने भने पनि अहिलेसम्म थालेको छैन । यो उमेर समूहका करिब ४० लाख बालबालिका छन् ।