काठमाडौं । भारतको केन्द्रीय बैंकले अप्रिल महिनाबाट सुरु हुने आगामी आर्थिक वर्ष २०२२/२३ मा आफ्नै डिजिटल करेन्सी कारोबारमा ल्याउने भएको छ ।

भारतीय अर्थमन्त्री निर्मला सीतारमणले मंगलबार युनियन बजेटमार्फत उक्त घोषणा गरेकी हुन् । सीतारमणले ‘सेन्ट्रल बैंक डिजिटल करेन्सी (सिबिडिसी)’ ब्लकचेन प्रविधिमा आधारित हुने पनि जानकारी गराएकी छन् ।

ब्लकचेन र अन्य प्रविधिहरूको प्रयोग गरी जारी गरिने डिजिटल रूपैयाँले अर्थतन्त्रलाई पनि ठूलो टेवा पुर्याउने अर्थमन्त्री सीतारमणले बताएकी छन् । पछिल्लो समय विश्वभर भर्चुअल करेन्सीमा आकर्षण बढ्दै गएको छ । विश्वका करिब ८० प्रतिशत केन्द्रीय बैंकहरूले आफ्नै डिजिटल मुद्रा सञ्चालनमा ल्याउन अध्ययन गरिरहेका छन् ।