काठमाडौं । फ्रेन्च लिग वान फुटबलमा पेरिस सेन्ट जर्मेन (पिएसजी) ले सहज जित निकालेको छ ।

गएराति भएको खेलमा पिएसजीले लिललाई ५–१ गोल अन्तरले हराएको हो ।

खेलको १० औँ मिनेटमा डानिलो पेरिएराले गोल गर्दै पिएसजीलाई सुरुवाती अग्रता दिलाए । यद्यपि, २८ औं मिनेटमा स्भेन बोटम्यानले गोल गर्दै लिललाई १–१ को बराबरीमा फर्काए ।

त्यसपछि खेलको ३२ औं मिनेटमा प्रेसनल किमपेम्बेले गोल गर्दै पिएसजीलाई २–१ को अग्रता दिलाए । उनले लियोनल मेसीको पासलाई सदुपयोग गरेका हुन् ।
त्यसपछि मेसी आफैंले गोल गर्दै पिएसजीलाई ३–१ ले अघि बढाए । उनले ३८ औं मिनेटमा गोल गरेका हुन् ।

खेलको ५१ औं मिनेटमा केलियन एमबाप्पेले गोल गर्दै टिमको अग्रता ४–१ को अवस्थामा पुर्याए ।

त्यसपछि पनि पिएसजी रोकिएन । खेलको ६७ औं मिनेटमा डानिलोले व्यक्तिगत दोस्रो गोल गर्दै पिएसजीलाई ५–१ को सहज जित दिलाए ।

यस जितसँगै जारी लिगमा पिएसजीले १३ अंकको अग्रता बनाएको छ ।

शीर्ष स्थानको पिएसजीले २३ खेलमा ५६ अंक जोडेको छ भने पराजित भएको लिल ३२ अंक जोडेर ११ औं स्थानमा रहेको छ ।