काठमाडौं । हेटौंडा उपमहानगरपालिकाकी मेयर मीनाकुमारी लामाले पदभार भ्रमणलगत्तैको पहिलो निर्णयमा लोकप्रिय कार्यक्रम अघि सारेकी छिन् ।

मेयरमा निर्वाचितलगत्तै लामाले विपन्नलाई स्वास्थ्य बिमा, निशुल्क खानेपानी, बिजुलीमा सहुलियत र छात्रवृत्तिसहितको कार्यक्रम घोषणा गरेकी हुन् ।

पहिलो बैठकबाट लामाले अति विपन्न १५४१ घरपरिवार लाई निशुल्क स्वास्थ्य बिमा, १५४१ घरपरिवारलाई निशुल्क मासिक १५ हजार लिटर खानेपानी र २५ युनिट विद्युत निशुल्क दिने घोषणा गरेकी छिन् ।

आर्थिक अवस्था कमजोर भएकालाई मेयर छात्रवृत्ति कार्यक्रम संचालन गर्ने, सडकका बीचमै छोडिएका पोललाई सार्ने, महिला जागरण समूहमार्फत लैंगिक हिंसाविरुद्धका अभियान चलाउने र महिला र बालबालिकाका लागि अल्पकालीन आश्रयस्थलको स्थापना गर्नेसहितका कार्यक्रमको घोषणा गरेकी छिन् । लामा नेकपा एकीकृत समाजवादीका तर्फबाट मेयरमा निर्वाचित भएकी हुन् ।