काठमाडौं । संसद्मा राष्ट्रपति विद्यादेवी भण्डारीले आगामी आर्थिक वर्षको नीति तथा कार्यक्रम सार्वजनिक गर्दागर्दै यता सवारी भाडा फेरि बढेको छ ।

जनताका ढाड सेकिने गरी आचक्ली बढेको महंगलाई उक्त नीति तथा कार्यक्रमले सम्बोधन गरेको देखिँदैन । यता सवारी भाडा यो सातामै दोस्रो पटक बढिसकेको हो ।

यसअघि जेठ ४ गतेबाट लागू हुनेगरी भाडा दर वृद्धि भएको थियो । यातायात व्यवस्था विभागले जनाएअनुसार डिजेलमा मूल्यवृद्धि भएको हुँदा मंगलबार बाट लागू हुने गरी भाडा बढेको जानकारी गराएको छ ।

नयाँ समायोजना अनुसार यात्रुवाहक सवारीमा २.१ प्रतिशत, पहाडी बाटोमा सञ्चालन हुने मालवाहक सवारीमा २.७ प्रतिशत र तराईको बाटोमा सञ्चालन हुने मालवाहक सवारीमा ३ प्रतिशतले मूल्यवृद्धि भएको छ ।

नेपाल आयल निगमले गत जेठ ८ मा इन्धनको मल्यमा प्रति लिटरले १० रुपैयाँका दरले बढाएको थियो । मूल्यवृद्धि अनुसार नै विभागले इन्धनको मूल्य ५ प्रतिशत वा सो भन्दा बढी भएमा स्वचालित रुपमा भाडा बढ्ने व्यवस्था गरेको थियो ।