काठमाडौं । काठमाडौं महानगरपालिकाका मेयर बालेन्द्र शाह (बालेन) ले प्रचण्डबाट प्राप्त सुझाव र हौसलाले थप ऊर्जावान् बनाएको बताएका छन् ।

एमाले अध्यक्ष केपी शर्मा ओली, कांग्रेस सभापति एवं प्रधानमन्त्री शेरबहादुर देउवापछि बालेनले शनिबार खुमलटार पुगेर माओवादी केन्द्रका अध्यक्षसँग भेटवार्ता गरेका थिए ।

‘प्रचण्डबाट प्राप्त सुझाव र हौसलाले हामीलाई थप ऊर्जावान् बनाएको छ,’ बालेनले सामाजिक सञ्जाल फेसबुकमा लेखेका छन् ।

बालेनका अनुसार, प्रचण्डले आफूले हिंसा र गालीगालौजको राजनीति गरेको उल्लेख गर्दै बालेनले कसैको आलोचना नगरी नयाँ किसिमबाट राजनीतिमा प्रवेश गरेको भन्दै प्रशंसा गरेका थिए । साथै प्रचण्डले बालेनले विकास गरेको संस्कृति र उदयलाई नयाँ किसिमको सामाजिक र राजनीतिक क्रान्ति भनेका छन् ।

‘… हतियारबाट राजनीति भयो । आलोचना र कतिपय अवस्थामा गालीगलौजकै स्तरको राजनीति पनि भयो । तर तपाईंले कसैको आलोचना नगरी नयाँ किसिमबाट राजनीतिमा प्रवेश गर्नुभयो । यो परिवर्तन मात्रै भएको होइन, नेपालमा नयाँ किसिमको राजनीतिक र सामाजिक क्रान्ति भएको हो,’ प्रचण्डको भनाइ उद्धृत गर्दै बालेनले लेखेका छन् ।