काठमाडौं । सरकारले बलात्कारसम्बन्धी मुद्दामा उजुरी दिने हदम्यादमा तत्काल पुनर्विचार नगर्ने भएको छ ।

कानुन, न्याय तथा संसदीय मामिलामन्त्री गोविन्द बन्दीले सोमबार सांसदहरूले उठाएको प्रश्नको जवाफ दिँदै विद्यामान कानुनमा पुनर्विचार नहुने बताए ।

‘हदम्यादसम्बन्धी विषयमा तपाईंहरूले उठाएको विषयमा सरकार गम्भीर छ । यसबारे अध्ययन गर्न कानुन आयोगलाई निर्देशन दिइसकेको छ’, मन्त्री बन्दीले भने, ‘एउटा घटनाबारे सार्वजनिक बहस हुँदैमा हदम्यादसम्बन्धी कानुन संशोधन हुँदैन । यसबारे सर्वोच्चको नजिर, विभिन्न देशमा भएका हदम्याद सम्बन्धी व्यवस्था र नेपाली समाजको बस्तुगत अवस्थाबारे अध्ययन प्रतिवेदन आएपछि मात्र प्रक्रिया अगाडी बढ्नेछ ।’

बलात्कार तथा यौनजन्य घटनामा उजुरी दिन विद्यामान कानुन संशोधन गरी हदम्याद हटाउन सांसदरूले सरकारले सुझाव दिएका थिए ।