काठमाडौं । सञ्चारकर्म छाडेर राष्ट्रिय स्वतन्त्र पार्टी खोलेका रवि लामिछानेले प्रवक्ताको जिम्मेवारी डा. मुकुल ढकाललाई दिएका छन् ।

पार्टी गठन गरे पनि आफ्ना सहयात्रीबारे सार्वजनिक नगरेका लामिछानेले प्रवक्ताको जिम्मेवारी डा. ढकाललाई दिएका हुन् ।

राष्ट्रिय स्वतन्त्र पार्टीले शुक्रबार गर्न लागेको पत्रकार सम्मेलनबारे जानकारी दिन जारी विज्ञप्तिमा डा. ढकालले हस्ताक्षर गरेका छन् ।

मोरङ स्थायी ठेगाना भएका ढकाल कालीकोटको रास्कोट अस्पतालका निर्देशक हुन् । यो अस्पताल रवि लामिछानेकै अगुवाइमा निर्माण भएको थियो ।

यसैबीच, नेपाल स्वतन्त्र पार्टीले शुक्रबार पत्रकार सम्मेलन गर्ने भएको छ । डा. ढकालद्वारा जारी विज्ञप्तिअनुसार, अपराह्न ४ बजे रिपोर्टस् क्लबमा पत्रकार सम्मेलन गर्ने तय भएको छ ।

घोषणा गरेको दिन पार्टी दर्ताका लागि लामिछानेले निर्वाचन आयोगमा निवेदन दिए पनि नामका कारण विवादमा फसेको छ । विभिन्न व्यक्तिहरूले स्वतन्त्र अभियानलाई भ्रमित गर्नेगरी नाम राखिएको दाबी गर्दै दर्ता नगर्न निर्वाचन आयोगमा निवेदन दिएपछि लामिछाने अप्ठ्यारोमा परेका छन् ।