काठमाडौं । कोलम्बियामा बुल फाइट भइरहेका बेला प्रदर्शनरीस्थलको स्ट्याण्ड भत्किँदा कम्तीमा चार जनाको मृत्यु भएको छ । कैयन् घाइते छन् ।

कोलम्बियाको एल एस्पिनल सहरमा सान पेडरो पर्वका अवसरमा आयोजित बुलफाइटका क्रममा घटना भएको हो । परम्परागत ‘कोरलेजा’कार्यक्रममा जनताहरू साँढे लिएर रिङमा प्रवेश गर्ने प्रचलन छ ।

यो पर्वको अवसरमा विगतमा पनि यसरी बुलफाइट गराइन्थ्यो । तर यस्तो घटना भएको यो पहिलो पटक हो ।

तोलिमाका गभर्नर जोस रिकार्डो ओरोज्कोले कम्तीमा ३० जना मानिस गम्भीर घाइते भएको बताएका छन् । त्यसैले मृत्यु हुनेको संख्या बढ्ने अनुमान गरिएको छ ।

घटनापछि कोलम्बियाका राष्ट्रपति गुस्ताभो पेट्रोले यस्ता कार्यक्रममा प्रतिबन्ध लगाउन स्थानीय अधिकारीलाई निर्देशन दिएका छन् ।

‘मानिस र जनावरको ज्यान जाने यस्ता कार्यक्रम नगर्न मैले त्यहाँका मेयरलाई निर्देशन दिएको छु,’ राष्ट्रपतिले भनेका छन् ।