इटाली । जलवायु परिवर्तनको असर विश्वका धेरै ठाउँमा देखिएको छ । कतै बाढी त कतै खडेरी । युरोपेली मुलुक इटालीमा यो वर्ष निकै कम वर्षा भएको छ । यही कारण देशका धेरै ठाउँमा खडेरी देखिन थालेको छ र इटालीकै लामो नदी पनि यसबाट अछुतो रहन सकेको छैन ।

स्याटेलाइट तस्बिरहरूले इटालीको सबैभन्दा लामो पो नदी साँघुरिएको देखाएको छ । कम वर्षा र बढ्दो तापक्रमका कारण नदी घट्दै गएको बताइएको छ । स्पेस एजेन्सीले एनिमेसनमा पिआसेन्जा सहरनजिक पो उपत्यकाको एक भाग देखाएको छ । यसमा जुन २०२० र जुन २०२२ को अवधिमा नदीको आकार घटेको स्पष्ट रूपमा देख्न सकिन्छ । पो नदी इटालीको सबैभन्दा लामो नदी हो ।

यो पो उपत्यकामा पश्चिमदेखि पूर्वसम्म फैलिएको छ । यसको लम्बाइ लगभग ६५२ किलोमिटर छ । यसले कुल ७१ हजार वर्ग किलोमिटर क्षेत्रफल ओगट्छ । यो वरपरका क्षेत्रहरूको लागि ताजा पानीको सबैभन्दा ठूलो स्रोत हो । किसानहरू खेतीका लागि यही खोलामा निर्भर छन् । मिडिया रिपोर्टका अनुसार पो उपत्यका छेउछाउका केही क्षेत्रमा ११० दिनसम्म पानी परेको छैन ।

७० वर्षको इतिहास हेर्‍यौं भने यतिबेला पो नदी सबैभन्दा खराब अवस्थाबाट गुज्रिरहेको छ । स्याटेलाइट तस्बिरले पहिले हिलो दलदल भएका नदीका ठाउँहरू अहिले पूर्ण रूपमा सुकेको प्रष्ट देखाउँछ । अहिले त्यो ठाउँमा बालुवा मात्रै देखिन्छ ।

अधिकांश खेती पो उपत्यका वरिपरि हुन्छ । गहुँ, चामल र गोलभेँडासहित इटालीको खानाको लगभग ४० प्रतिशत यहाँ खेती गरिन्छ । खडेरीका कारण किसानलाई खेती गर्न निकै समस्या भएको छ । बालीका लागि पर्याप्त पानी छैन ।

खडेरीका कारण भएको पानीको अभावलाई मध्यनजर गर्दै इटालीको मिलान सहरका मेयरले हिरका सबै फोहरा बन्द गर्न निर्देशन दिएका छन् ।