काठमाडौं । आगामी संसदीय निर्वाचनमा काठमाडौं क्षेत्र नम्बर ६ बाट स्वतन्त्र रूपमा लड्ने घोषणा गरेका अब्दुस मियाँले बिहीवार निर्वाचन आयोगका प्रमुख आयुक्त दिनेशकुमार थपलियासँग भेट गरेका छन् ।

बिहीबार अपराह्न निर्वाचन कार्यालयमा भएको भेटमा मियाँले विदेश बस्ने नेपालीहरूले मतदान गर्न पाउने अधिकारबारे जिज्ञासा राखेका थिए ।

करिब आधाघण्टा भएको भेटमा मियाँले समग्र निर्वाचन प्रणाली र आयोगको तयारीका बारेमा पनि जानकारी लिएका थिए ।

जवाफमा आयोगका प्रमुख आयुक्त थपलियाले विदेशमा बस्ने नेपालीहरूलाई मतदान अधिकार दिन तत्काल सम्भव नरहेको बताए ।

’हाम्रो कानूनमा त्यस्तो व्यवस्था छैन,’ थपलियाले भने, ’तर त्यसका लागि अध्ययन भइरहेको छ । हामी कानूनको ड्राफ्ट निर्माण प्रक्रियामा छौं । आयोगले छुट्टै समिति बनाएर रिसर्च गरिरहेको छ ।’

पहिला विदेशमा बस्नेहरूको मतदाता नामावली संकलन गरिने र त्यसपछि मतदान हुँदा प्रक्रियालाई अघि बढाउने क्रममा आयोग रहेको थपलियाले बताए ।

यही कात्तिक अन्तिम या मङ्सिरमा हुने संसदीय चुनावमा भने त्यो सम्भव नरहेको थपलियाले दाबी गरे ।

मियाँ काठमाडौं जिल्लाको निर्वाचन क्षेत्र नम्बर ६ का उम्मेदवार हुन् । केही साता अघि उनले आफ्नो उम्मेदवारी घोषणा गरेका थिए ।

यसअघि विवेकशील साझा पार्टीमार्फत राजनीतिक सक्रियता देखाएका मियाँ पार्टीबाट राजीनामा दिएर स्वतन्त्र उम्मेदवार बन्ने निर्णयमा पुगेका हुन् ।