काठमाडौं । आगामी मंसिर ४ मा हुन गइरहेको प्रतिनिधिसभा तथा प्रदेशसभा निर्वाचनमा प्रत्येक निर्वाचन क्षेत्रमा उम्मेदवारी दिने दलहरूको चुनाव चिह्न मात्र मतपत्रमा राखिने भएको छ ।

प्रतिनिधिसभा सदस्यको प्रत्यक्ष र समानुपातिक तथा प्रदेशसभाको प्रतिनिधिसभा सदस्यको प्रत्यक्ष र समानुपातिक गरी चारवटा अलग–अलग मतपत्र हुने निर्वाचन आयोगले जनाएको छ ।

‘आयोगले यो पटक प्रत्यक्षतर्फको मतपत्रमा प्रत्येक निर्वाचन क्षेत्रमा उमेदवारी दिएका उम्मेदवारको मात्र निर्वाचन चिह्न समावेश गरेर मत्रपत्र छापाई गर्ने सोच बनाएको छ,’ प्रमुख निर्वाचन आयुक्त दिनेशकुमार थपलियाले भने ।

यसअघिको स्थानीय तह निर्वाचनमा उम्मेदवार नभएकाको पनि मतपत्रमा चिन्ह भएका कारण धेरै मत बदर भएको थियो । उम्मेदवार नै नउठेको चिन्हमा समेत मतदान भएको थियो ।

योपटक पनि सत्तारुढ गठबन्धनका नेताहरूले तालमेल गरेरै चुनावमा जाने निर्णय गरिसकेका छन् । आयोगको याे निर्णयले उनीहरूलाई फाइदा हुने देखिन्छ ।