काठमाडाैं । राष्ट्रपति विद्यादेवी भण्डारीले नागरिकता विधेयक फिर्ता गरेको भन्दै तरूण दलले राजीनामा दिन नभए  महाअभियोग लगाएर हटाउन माग गरेको छ । अध्यक्ष विद्वान गुरुङले विज्ञप्ति जारी गर्दै राष्ट्रपतिले प्रतिशोध साँधेर नागरिकता विधेयक फिर्ता गरेको आरोप लगाउँदै दलले यस्ताे माग गरेकाे हाे ।

नागरिकलाई संविधानले दिएको अधिकार कुण्ठित गर्ने काम गरिमामय पदमा बस्ने राष्ट्रपतिलाई नसुहाउने भन्दै दलले राजीनामा दिन नभए महाअभियोग लगाउन माग गरेको हो ।

‘राष्ट्रको गम्भीर र जनताको जीवनसँग जोडिएको विषयमा खेलवाड गर्ने, बेवास्ता गर्ने र सीमित राजनीतिक पार्टीको चौघेरामा बसेर पदको मर्यादामा नरहने राष्ट्रपतिले नैतिकताको उच्च उदाहरण बनी राजीनामा दिनु उचित हुने अन्यथा महाअभियोगबाट पदच्युत समेत गर्न सार्वभौम संसद र नेपाल सरकारसँग नेपाल तरुण दल केन्द्रीय समिति जोडदार आग्रह गर्दछ ।’ दलको विज्ञप्तिमा भनिएको छ ।