काठमाडौं । नेपाली राष्ट्रिय क्रिकेट टिमका कप्तान सन्दीप लामिछानेलाई नाबालिका बलात्कार गरेको आरोप लागेको छ ।

लामिछानेविरुद्ध मंगलबार साँझ जिल्ला प्रहरी कार्यालय, टेकुमा जाहेरी परेको छ । स्रोतका अनुसार, १८ वर्षमुनिकी ती किशोरी काठमाडौंको एक कलेजमा अध्ययनरत छिन् ।

जाहेरीमा ती किशोरीले गत ५ भदौमा काठमाडौंको एक होटेलमा सँगै बसेको र त्यहाँ आफूमाथि बलात्कार भएको दाबी गरेकी छन् । सोही दिन दिउँसो नगरकोट घुम्न गएको तर केही नगरेको पनि उजुरीमा उल्लेख छ ।

जाहेरीपछि प्रहरीले घटनामाथि अनुसन्धान अघि बढाएको छ । प्रहरी स्रोतका अनुसार, किशोरीको स्वास्थ्य जाँच गरी घटना भएको भनिएको होटेलको प्रमाण संकलन गर्ने तयारी अघि बढाइएको छ ।

क्रिकेटर सन्दीप घटना भएको भोलिपल्ट विदेश उडेका थिए । हाल उनी क्यारेबियन प्रिमियर लिगमा सहभागिताका लागि वेस्टइन्डिजमा छन् ।