काठमाडौं । नेपाली सेनाले पुरानै पृतना संरचनालाई ब्युँताएको छ । एकवर्ष अघि लागु गरिएको तीन जोड एक अर्थात ‘थ्रि प्लस वान’ कमाण्ड अवधारणालाई कायमै राखि पुरानै संरचनामा फर्किको हो । कमान्ड संरचना अनुसार पूर्वी, मध्य, पश्चिम र उपत्यका कमान्ड बनाएको थियो ।

भदौ २१ गते बसेको मन्त्रिपरिषद् बैठकले कमान्ड संरचनालाई कायमै राखि पुरानो संरचनालाई ब्यूँताउने निर्णय गरेको थियो । सैनिक प्रवक्ता नारायण सिलवालका अनुसार कमान्ड संरचना कायमै राखि पृतना संरचनालाई व्यूँताइएको जानकारी दिए । ‘नयाँ संरचना गएपछि विभिन्न व्यवहारिक र प्राविधिक कठिनाइ देखिएका छन्’, सिलवालले भने, ‘यी सबै कठिनाइलाई ध्यानमा राखि तत्कालका लागि पुरानै संरचनामा फर्किने निर्णय गरेका छौं । पुरानो संरचना अर्कोसाताबाट लागु हुन्छ ।’

यसअघि सेनाले संघीयतालाई ध्यानमा राखि सात प्रदेश र उपत्यका गरी आठ पृतना कायम गरिएको थियो । तर २०७८ असार २४ मा बसेको मन्त्रिपरिषद बैठकले खारेज गरी कमान्ड संरचना लागु गर्ने निर्णय गरेको थियो ।

पुरानै संरचनामा फर्किएपछि अब सेनामा पूर्वी, मध्यपूर्वी, मध्य, उपत्यका, पश्चिम, मध्यपश्चिम, उत्तर पश्चिम र सुदूरपश्चिम पृतना हुनेछन् ।